Текелі полиметалл кен орны

Текелі полиметалл кен орны – Жетісу облысы Ескелді ауданы Қарабұлақ кентінен оңтүстік-шығысқа қарай 27 км жерде орналасқан кен орны. Кенді инженер-геолог М.Юдичев пен М.Қадылбеков басқарған геология отряды ашқан (1933). Кен орны туралы алғашқы ғылыми деректер А.И. Шренк, П.П.Семенов-Тянь-Шанский, И.В.Мушкетов, А.В. Обручев еңбектерінде кездессе, бастапқы зерттеу жұмыстарын Е.А. Немов, Т.Н. Шадлун, Б.А. Вейц, кейіннен Х.И. Мурсалимов, Г.Б.Паталаха, Ш. Байкенов, Е.А. Әлпиев, т.б. жүргізген. 1935-1937 жылдары барланып, қоры есептелінген. 1942 жылдан пайдаланылып келеді.

Текелі полиметалл кен орны
44°51′33″ с. е. 78°47′20″ ш. б. / 44.859276° с. е. 78.7887955° ш. б. / 44.859276; 78.7887955 ^(G) ^(O) ^(Я)Координаттар: 44°51′33″ с. е. 78°47′20″ ш. б. / 44.859276° с. е. 78.7887955° ш. б. / 44.859276; 78.7887955 ^(G) ^(O) ^(Я)^(T)
Ел	Қазақстан
Аймақ	Жетісу облысы
Ашылған уақыты	1933 жыл
Өндіре бастады	1942 жыл
Текелі полиметалл кен орны
Текелі полиметалл кен орны

Геологиялық құрылымы

Құрылымы жағынан Текелі-Көксу кентасты алаңында орналасып, Оңтүстік Жоңғар антиклинорийінің солтүстік қанатымен ұштасып жатыр. Кенді алаң көлемінде орталығы рифейдің Текелі свитасын құрайтын әктасты-тақтатасты шөгінді тау жыныстары кең тараған.

Жатыс сипаты, минералдары

Кен денесі қалыңдығы кей жерінде ондаған м-ге жететін кентас иірімдері ендік бағытта созылып, солтүстікке қарай 60 – 80^° бұрышпен еңістенген шоғыр. Кен шоғыры солтүстік, орта және оңтүстік кентасты денелерге бөлінеді. Кентастың басты минералдары: пирит, сфалерит, галенит. Негізгі металдары: мыс пен мырыш, қорғасын, олардан басқа күміс, алтын, висмут, кадмий, ванадий, скандий, т.б. платина тобындағы металдар кездеседі. Кентасты шахта әдісімен өндіріп, байыту фабрикасына жіберіліп отырды. Кеннің қоры 15865 мың т, оның ішінде қорғасын – 387,7 мың т, мырыш – 723,4 мың т, күміс – 320,8 мың т, кадмий – 1745 т, сүрме – 2856 т.

Дереккөздер

1. Қазақ энциклопедиясы, 8-том