Көкпекті ауданы Абай облысының оңтүстік шығыс бөлігіндегі әкімшілік бөлік Алғаш рет 1932 жылы құрылды 1997 жылы аудан құ

Көкпекті ауданы — Абай облысының оңтүстік-шығыс бөлігіндегі әкімшілік бөлік. Алғаш рет 1932 жылы құрылды. 1997 жылы аудан құрамына Самар ауданы еніп, 2022 жылы қайта бөлініп шықты. Жер аумағы 9,1 мың км².

Әкімшілігі
Қазақстан ауданы
Көкпекті ауданы
Облысы	Абай облысы
Аудан орталығы	Көкпекті
Ауылдық округтер саны	9
Ауыл саны	28
Әкімі	Әділет Нұрсағатұлы Қожанбаев
Аудан әкімдігінің мекенжайы	Көкпекті ауылы, Шериаздан көшесі, №44а
Тарихы мен географиясы
Координаттары	48°45′27″ с. е. 82°22′54″ ш. б. / 48.75750° с. е. 82.38167° ш. б. / 48.75750; 82.38167 ^(G) ^(O) ^(Я)Координаттар: 48°45′27″ с. е. 82°22′54″ ш. б. / 48.75750° с. е. 82.38167° ш. б. / 48.75750; 82.38167 ^(G) ^(O) ^(Я)
Құрылған уақыты	1932
Жер аумағы	9,1 мың км²
Уақыт белдеуі	UTC+5:00
Тұрғындары
Тұрғыны	13 636 адам (2023)
Ұлттық құрамы	қазақтар (84,23%), орыстар (9,6%), татарлар (2,58%), немістер (2,27%), басқа ұлт өкілдері (1,32%)
Сандық идентификаторлары
Автомобиль коды	18
Көкпекті ауданының әкімдігі

Географиялық орны, жер бедері

Аудан батысында Жарма, оңтүстігінде Ақсуат аудандарымен, солтүстігі мен шығысында ШҚО-ның Ұлан, Самар, Күршім аудандарымен шектесiп жатыр.

Ауданның жер бедері күрделі. Солтүстік бөлігін түгелдей Қалба жотасының шығыс жағы, оңтүстік бөлігін Зайсан қазаншұңқырының солтүстік бөлігі алып жатыр. Қалба жотасының екі беткейі де Ертіс өзенінің салаларымен тілімденген. Ауданның ең биік жері – Қаражал (1606 м). Зайсан қазаншұңқыры жалпы жазық болып келсе де оның әр жерінде шоқылар кездеседі. Олардың ең ірілері: Ұзынбұлақ (818 м), Ақшоқы (907 м), Қарақия (823 м), Толағай (721 м). Кен байлықтарынан ауданның жер қойнауында түсті металдардың, құрылыс материалдарының (әктас, қиыршықтас) мол қоры бар. Таз шоқысы түгелдей дерлік әктастан тұрады.

Климаты, өсімдігі мен жануарлар дүниесі

Ауданның климаты тым континенттік: қысы суық, жазы ыстық, қуаң (Зайсан қазаншұңқырында). Қаңтарда ауаның орташа температурасы –20,9°С, шілдеде 20,4°С. Жауын-шашынның жылдық орташа мөлшері 200 мм-ден (қазаншұңқырда) 350 – 400 мм-ге дейін барады (Қалба жотасында). Қалба мен оның оңтүстік-батыс сілемінен Зайсан көлі мен Ертіс өзеніне Қарабұғаз, Қурайлы, Көкпекті (салалары Шегелек, Талды, Қосағаш, Кіндікті), Үлкен Бөкен (салалары: Тасмөңке, Тентек, Кішібөкен), Құлажон, т.б. өзендер құяды. Солтүстік-батыстағы Ақсу, Қурайлы өзендері Зайсан көліне жетпей, оның жағасындағы құмға сіңіп кетеді. Ауданның оңтүстік және оңтүстік-шығыс жағын Зайсан көлі мен Ертіс өзеніндегі Бұқтырма бөгені алып жатыр. Аудан жерінің топырағы, негізінен, бозғылт қоңыр. Қалба тауында және өзен аңғарларында қара топырақ тараған. Далалы өңірде бетеге, көде, сарыбас жоңышқа, ұсақ шоқылы жерлерде қараағаш, тобылғы өседі. Тау ішіндегі ылғалды жерлерде шалғын, Қалба жотасында қылқан және жалпақ жапырақты орман, оның сілемдерінің бойында шоқ қайың, терек, мойыл, долана, қарақат, әр түрлі шөптер өседі. Жануарлар дүниесінен қасқыр, түлкі, аю, күзен, қоян, тиін, бұғы, елік, құстардың сан алуан түрі (қаз, үйрек, аққу, шағала, қызғыш, бүркіт, қаршыға, лашын, ителгі, кезқұйрық, тұрымтай, т.б.) тараған. Көлдер мен өзендерде әр түрлі балықтар мекендейді.

Халқы

1939	1959	1970	1979	1989	1999	2009	2021	2023
23719	▲28226	▲33361	▼32970	▼32808	▲45746	▼18375	▼13932	▼13636

Тұрғындары 13 636 адам (2023). Ұлттық құрамы: қазақтар – 76,23%, орыстар – 19,80%, татарлар – 1,52%, немістер – 1,39%, басқа ұлт өкілдері – 1,06%.

Әкімшілік бөлінісі

28 елді мекен 9 ауылдық округке біріктірілген:

Халқының саны (2009, 2021)
Ауылдық округтері	2009	2021	2021 2009-ға пайызбен	Ерлер 2009	Ерлер 2021	2021 2009-ға пайызбен	Әйелдер 2009	Әйелдер 2021	2021 2009-ға пайызбен
Биғаш ауылдық округі	1010	▼ 380	37,6	543	▼ 216	39,8	467	▼ 164	35,1
Көкжайық ауылдық округі	2075	▼ 1479	71,3	1050	▼ 790	75,2	1025	▼ 689	67,2
Көкпекті ауылдық округі	6214	▼ 5718	92	3032	▼ 2824	93,1	3182	▼ 2894	90,9
Қойгелді Аухадиев ауылдық округі	2155	▼ 1445	67,1	1057	▼ 741	70,1	1098	▼ 704	64,1
Тассай ауылдық округі	1492	▼ 1255	84,1	760	▼ 642	84,5	732	▼ 613	83,7
Теректі ауылдық округі	995	▼ 623	62,6	538	▼ 321	59,7	457	▼ 302	66,1
Үлгілі Малшы ауылдық округі	1669	▼ 1112	66,6	889	▼ 590	66,4	780	▼ 522	66,9
Үлкен Бөкен ауылдық округі	2019	▼ 1452	71,9	1021	▼ 753	73,8	998	▼ 699	70
Шұғылбай ауылдық округі	746	▼ 468	62,7	366	▼ 239	65,3	380	▼ 229	60,3
ЖАЛПЫ САНЫ	18375	▼ 13932	75,8	9256	▼ 7116	76,8	9119	▼ 6816	74,7

Ірі елді мекендері

Елді мекен	Халқы (2021)
Көкпекті	▼ 5103
Үлкен Бөкен	▼ 1296
Преображенка	▼ 1159
Тассай	▼ 1000
Көкжайық	▼ 995
Үлгілі Малшы	▼ 645
Теректі	▼ 623
Шұғылбай	▼ 398
Биғаш	▼ 334

Әкімдері

Асхат Смаилов (2018-2020)
Серікқазы Садуақасов (2020-2021)
Раджан Сейітқанов (2021-2022)
Ділдәбек Оразбаев (06.2022 бастап)

Ауыл шаруашылығы

Ауыл экономикасының негізін а. ш. құрайды. Ауданда 235,8 мың га-дан астам а. ш. жері бар, 73,7 мың га егістік жер, 36,5 мың га шабындық, 125,6 мың га жайылым. Аудан жері арқылы солтүстік-батыстан оңтүстік-шығысқа қарай респ. маңызы бар Павлодар – Семей – Георгиевка – Көкпекті – Зайсан – Майқапшағай (Қытаймен шекараға дейін) және облыстық маңызы бар Өскемен – Жарма автомобильдік жолдары өтеді.

Дереккөздер

Қазақстан Республикасы халқының жынысы және жергілікті жердің типіне қарай саны (2023 жылғы 1 қаңтарға)
Қазақстан Республикасы халқының жекелеген этностары бойынша саны (2023 жыл басына)
Ресей империясы, КСРО халық санақтары
ҚР халық санақтары
2021 жылғы ұлттық халық санағының қорытындылары

[1] Қазақстан Республикасы халқының жынысы және жергілікті жердің типіне қарай саны (2023 жылғы 1 қаңтарға)

[2] Қазақстан Республикасы халқының жекелеген этностары бойынша саны (2023 жыл басына)

[3] Ресей империясы, КСРО халық санақтары

[4] ҚР халық санақтары

[5] 2021 жылғы ұлттық халық санағының қорытындылары