Еуропалық комиссия

Еуропалық комиссия - Еуропалық одақтың және оған кіретін үш қоғамдастықтың (Еуропалық көмір және болат қорыту бірлестігі, Еуропалық экономикалық қоғамдастық, Еуропалық атом энергиясын өндіру жөніндегі қоғамдастық) атқарушы және басқарушы органдарының бірі. Комиссия 1967 жылы 1 шілде күні құрылған, 20 мүшесі (Германия, Испания, Италия, Ұлыбритания, Франция мемлекеттерінің 2-ден, қалғандарының 1-ден өкілдері) бар. Комиссия мүшелерін сол елдің үкіметі тағайындайды. Еуропалық комиссия өз міндетін атқару кезінде қоғамдастықтың ортақ мүддесін көздеп, кейбір мүше мемлекеттердің қоғамдастықты жеке мүдделеріне пайдалануына мүмкіндік бермейді. Ол Еуропалық одақ кеңесінің жарлықтарын бұлжытпай орындайды және кейбір талас мәселелерді алдына қояды. Еуропалық одақ кеңесінің ішінде немесе кеңес пен Еуропалық парламент арасында дау болған жағдайда тек Еуропалық комиссияның ғана бұл дауға араласып, оларды татуластыруға құқы бар. Сондай-ақ, Еуропалық комиссия Еуропалық одақ атынан мүше емес мемлекеттермен және басқа халықаралық ұйымдармен келісімдер жасауға құқылы. Еуропалық комиссияның штаб-пәтері — Брюссель мен Люксембургте орналасқан. Ол Бас директорат деп аталып, 23 департаменттен тұрады. Еуропалық комиссияның автономиялы қаржы жүйесі бар және өз бюджетін қайда жұмсауды өзі шешеді. 20 ғасырдың аяғында Еуропалық комиссия жұмысының басты бағыттарының бірі ТМД елдерінің экономикалық және гуманитарлық дамуына көмек көрсету болды. Осы мақсатта көптеген бағдарламалар мен жобалар жасалған. Оның ең бастылары: ТАСИС ([[[ТМД]] елдеріне техникалық көмек көрсету) пен ТЕМПЮС (ағарту және ғылымның дамуына көмек көрсету) бағдарламалары 1994 жылы Алматыда Еуропалық комиссияның өкілдігі ашылды.

Сілтемелер

Қазақ энциклопедиясы