Ж. Аймауытов атындағы Павлодар облыстық қазақ музыкалық драма театры

Ж. Аймауытов атындағы Павлодар облыстық қазақ музыкалық драма театры – Павлодар қаласындағы мәдени-сахналық ұжымның бірі.

Ж. Аймауытов атындағы Павлодар облыстық қазақ музыкалық драма театры
Орналасуы	Қазақстан Павлодар
Негізделгені	1990
Директоры	Темірбек Арман
Көркемдік жетекшісі	Ержан Қауланов
Бас режиссёрі	Әділет Ақанов
Бас дирижёрі	Болат Рахымжанов
Бас балетмейстері	Талғат Хандсурен

Тарихы

Театр өз шымылдығын 1990 жылғы 7 желтоқсанда ҚР еңбек сіңірген қайраткері, Мемлекеттік сыйлық лауреаты Ерсайын Тәпеновтің қойылымындағы М. Әуезовтің "Айман-Шолпан" музыкалық комедиясымен ашты. Театр труппасын Алматы мемлекеттік театр-көркемсурет институтының (қазіргі Қазақ ұлттық өнер академиясының) драма актерлері (жетекшісі – проф. Р. Қаныбаева) мен муз. комедия (жетекшісі – проф. І. Кенжетаев) бөлімін бітірушілер және Қарағандыдан режиссер Е. Тәпенов бастап келген С. Бекболатов, А. Жукин, С. Тәжібаев, Р. Тәжібаева сынды сахна шеберлері, Жезқазған (актер М. Манапов) мен Талдықорған (Ж. Шайкина) театрларынан келген актерлер құрады.

Қойылымдары

Театр репертуарынан ұлттық және аударма пьесаларымен қатар музыкалық шығармалар да елеулі орын алды. Олардың қатарында Ғ. Мүсіреповтің “Ақан сері – Ақтоқты” және “Қозы Көрпеш – Баян сұлу”, М. Әуезовтің “Қарагөз”, А. Сейдімбек пен Б. Ұзақовтың “Күзеуде”, М. Байсеркеұлының “Абылай ханның ақырғы күндері”, Д. Исабековтің “Әпке”, У. Гаджибековтің “Аршин мал аланы”, И. Кальманның “Сильва” опереттасы, т.б. бар. Театр құрамында симфониялық оркестр (дирижері Б. Рахымжанов) және бишілер тобы (жетекшісі Б. Қырықбаева) жұмыс істейді. Театр құрамы әр жылдары келген Т. Атамбекова, М. Байжұманов, Ж. Доспаев, М. Доспаева, К. Жексенбаева, Е. Жанайхан, Г. Қайырбекова, Е. Айтпаев, Г. Саймасаева, Б. Шанимов, Д. Ұябаев, Б. Құрбанова, А. Таспаева, Д. Құспанова, Б. Иманғожаев, К. Айтмұрзаев сынды актерлермен толықтырылды.

Театр жетістіктері

Театр көрермен қауымның ойынан шығып, жоғарғы кәсіби, өз ісінің майталмандары болып табылатын актерлер ұжымынан құрылған үлкен қара шаңыраққа айналып, республика театрларының алдыңғы қатарында көрініп жүр. Театр қойылымдарын сахналау мақсатында Қазақстан мен шетел сахналарының жетекші шебер мамандары шақырылып тұрады. Өнер отауының репертуарында 90-нан астам әртүрлі жанрдағы спектакль бар. Театр сахнасында әлемдік, орыс және ұлттық драматургияның үздік үлгілері сахналанып, көрермен қауым тарапынан сұранысқа ие болуда.

• 1995 және 2008 жылдары театр актерлері Мысырдағы халықаралық ұлттық театрлар фестивалінде лауреат атанды.

• 2001 жылы Бішкекте өткен халықаралық театрлар байқауында театр актері Бейбіт Шәнім "Үздік ер адам рөлі үшін" номинациясымен марапатталды.

• Ақтау қаласында өткен XVI республикалық Нұрмұхан Жантөриннің 80 жылдығына арналған театр өнері фестивалінде театр Ақтаудағы Нұрмұхан Жантөрин атындағы музыкалық драма театры бірінші орынды өзара бөлісті.

Театр әртістері

Аида Жәмішева, Айзана Тасболатова, Айнаш Хабеева, Айсұлу Балтабаева, Ақтілек Ақдәулет, Ақық Таспаева, Атамбек Тәлжібек, Әйгерім Сүлейменова, Әділ Дәурен, Бағила Мұратқызы, Бауыржан Қайратұлы, Бауыржан Манатбекұлы, Бахаргүл Құрбанова, Баян Исабекова, Бек Тоқатов, Бекнұр Дастанұлы, Гүлжан Қайырбекова, Гүлжанат Омарова, Гүлжихан Хамитова, Дина Құспан, Еркежан Төлеубек, Жұмахан Доспаев, Қарлығаш Жексембаева, Құралай Мұсанова, Медет Садығазин, Нұржан Ахметбекұлы, Нұржан Бауыржанұлы, Рауза Тәжібаева, Рахат Амангелдіұлы, Руслан Зекенұлы, Шанім Бейбіт.

Дереккөздер

1. Қазақ мәдениеті. Энциклопедиялық анықтамалық. Алматы: “Аруна Ltd.” ЖШС, 2005 ISBN 9965-26-095-8
2. Қазақстанның мәдени ошақтары. Культурные центры Казахстана: Фотоальбом. – Алматы:«АСА» Баспа үйі» ЖШС, 2012. – 288 б. (қазақ, орыс, тілдерінде) ISBN 978-601-80325-0-9

Театр сайты

http://www.teatrpavlodar.kz/