Бор сылдыршөбі

Бор сылдыршөбі (Sіlene cretacea) – қалампырлар тұқымдасы, сылдыршөп туысына жататын көп жылдық шөптесін өсімдік. Батыс Қазақстанда құмайт-саз төбелерде кездеседі. Биіктiгі 10 – 30 см, ақшыл сабақтарының түп жағы сүректенген. Жапырақтарының ұзындығы 5 – 15 см, жуандау, үшкір, шет жиегі бұдыр, имектеу келеді. Ақ, кейде қызғылт гүлдері дара, кейде 2 – 3-тен топтала орналасады. Тұқымынан көбейеді. Мамыр – шілде айларында гүлдеп, тамызда жемістенеді. Бор сылдыршөбі тек түнде ғана гүлдейді. Оларды түн көбелектері тозаңдандырады. Жемісі – жұмыртқа тәрізді қорапша, ұзындығы 10 – 12 мм. Бор сылдыршөбі – хош иісті, сирек кездесетін реликт өсімдік, қорғауға алынып, Қазақстанның «Қызыл кітабына» енгізілген.

Дереккөздер

1. Қазақ Энциклопедиясы