Басқа мағыналар үшін Аралтөбе деген бетті қараңыз Аралтөбе жер атауы Семей қаласының оңтүстігіндегі Орда тауының құйрық

Басқа мағыналар үшін Аралтөбе деген бетті қараңыз.

Аралтөбе – жер атауы. Семей қаласының оңтүстігіндегі Орда тауының құйрық сілемі. Семей - Алматы бекет жолының бойында.

1880 жылдардан бастап Абайдың екінші әйелі Әйгерімнің қыстауы қоныс тепкен. Абай Аралтөбеде 10 жылдай тұрып, шығармашылықпен белсене айналысты. Ақын шығармаларының дені осындағы қыстауда жазылды. Соның ішінде Аралтөбе Пушкин, М. Лермонтов, И. Крыловтан аударған өлеңдер де бар. Аралтөбе Семейге ұрымтал әрі бекет жолының бойында болғандықтан, Абай әдейі таңдап алған. Баласы Ақылбайдың қыстауы да Аралтөбеден үш-төрт шақырым жердегі Тышқан деген бұлақтың басына орналасқан. Әуездің мекені - Бөрілі Аралтөбеден 7- 8 шақырымдай ғана қашықтықта жатыр. Аралтөбенің көріністері мен табиғат суреттері Әуезовтің «Абай жолы» эпопеясында барынша қанық бейнеленген. Абайдың бәйбішесі Ділдә мен Әйгерімнің зираты осы Аралтөбеде.

Абайдың қолжазбалары мен үй жиһаздарын 1927 ж. Жағыпар Мағауияұлы тәркіден жасырып, Аралтөбедегі зираттың қасына көмген. Ол асыл мұра қолды болып кеткен. 1950 ж. М. Әуезов Қ. Мұқаметханов, Қ. Аманжолов, И. Жағыпароваларды арнайы Аралтөбеге жіберген. Бірақ тығылған қолжазбалар табылмады. Қазір Аралтөбеде Ділдә мен Әйгерімнің ақ ұлутастан тұрғызылған сағаналары бар.

Дереккөздер

Мұхтар Әуезов энциклопедиясы — Алматы, «Атамұра» баспасы, 2011 жыл. ISBN 978-601-282-175-8

[1] Мұхтар Әуезов энциклопедиясы — Алматы, «Атамұра» баспасы, 2011 жыл. ISBN 978-601-282-175-8