Сатқынбай Әлмесұлы

Сатқынбай Әлмесұлы (1857, Қордай ауданы, Сұлутөр баурайы – 1933, сонда) – күйші, халық композиторы.

Дулат тайпасының Жаныс руынан.

Сатқынбай атақты күйші, әрі шешен Бердібек Мықтыбекұлымен аталас жақын туыс болып келеді. Сондықтан ол әуелі Бердібектің тәрбиесін көріп, сол кездегі әйгілі халық композиторы Байсерке Қылышұлының назарына ілігеді. Шәкірті ретінде Байсеркенің қасына ілеседі, жиын-тойларда бірге жүреді. Бірте-бірте Байсерке мен Бердібектің күйлерін шебер орындаушы, саусағынан бал тамған домбырашыға айналды. Оның орындауында Байсеркенің «Ұран күй», «Жекпе-жек», «Қоңыр», «Ат ойнатқан», «Сұлутөр», «Атеке», Бердібектің «Жасы мерген», «Кездесу», «Жігіт» тағы басқа күйлері жаңаша бояу-үнге ие болып, ел ішіне кең тарайды. Байсерке мен Бердібек күйлерін бізге жеткізген дарынды домбырашы-күйшінің бірі – осы Сатқынбай болып табылады. Ахмет Жұбанов Сатқынбайды Байсеркенің талантты шәкірттерінің бірі ретінде атайды. Шебер орындаушылығымен атағы шыққан Сатқынбай өз жанынан «Аққу», «Көк серке», «Қарлығаш», «Боз жорға», «Бет ашар» тәрізді күйлер шығарған. Бұл күйлердің музыкалық сазынан табиғат пен жан-жануарлардың, құстардың үндеріндегі бір-бірімен үйлесімді үндестік, байланыстылық анық аңғарылады. Сатқынбай күйлеріндегі өзіндік ерекшеліктердің бірі – әр күйдің шығу тарихына байланысты мазмұндық оқиғалар музыкалық иірімдермен шебер өрнектеліп, шынайы суреттелуінде.

Дереккөздер

1. Баспа бас директоры:Әшірбек Көпіш Бәйдібек баба - Алып бәйтерек ұрпақтарының шежіресі. Жаныс — Алматы: Издательство Өнер, 2004. — 992 б. — ISBN 9965-595-78-Х.
2. Тараз : Жамбыл облысы энциклопедиясы. Алматы, ISBN 9965-9389-1-1