Ромни-марш

Ромни-марш — тез жетілгіш етті-биязылау жүнді қой тұқымы. 19 ғасырда Англияның жергілікті қылшық жүнді саулықтарды тез жетілгіш, ұзын жүнді лейстер қошқарларымен будандастыру арқылы алынған. Ромни-марш қойлары жұмыр да берік бітімді, мүйізсіз жалпақ басты, арқасы тегіс болып келеді. Жүні ақ, салалы, жіңішкелігі 46 — 50 сапада, ұзындығы 12 — 15 см. Қошқарларынан 6 — 7, саулықтарынан 3 — 4 кг жүн қырқылады. Таза жүн шығымдылығы 50%-дан жоғары. Қошқарлары 90 — 130 кг, саулықтары 70 — 90 кг салмақ тартады. Ромни-марштың тез жетілуге, бордақылануға бейімділік қасиеттері мен ет сапасы өте жоғары. Сүт ему кезеңінде жақсы жайылымдарға бағылған қозылар тәулігіне 200 — 300 г салмақ қосып, 4 айда 32 — 35 кг, 1 жылда 60 — 70 кг-ға дейін жетеді. Бордақыланған қойлардың сойыс шығымдылығы 50 — 55%. Саулықтарының сүттілігі жоғары, төлшеңдігі 115 — 130%. Қой тұқымы Еуропа, Австралия, Жаңа Зеландия, Оңтүстік Америка елдерінде қойлардың ет, жүн өнімділіктерін жақсарту мақсатында будандастыру жұмыстарына кеңінен пайдаланылады. Ромни-марш қошқарлары қазақтың етті-биязылау жүнді қойы мен қазақтың биязылау ұзын жүнді қойы, кроссбред қойы тұқымдарын шығаруға пайдаланылды.

Дереккөздер

1. Қазақ энциклопедиясы, 7 - том