Пионер газ кен орны

Пионер газ кен орны — Оңтүстік Маңғыстау ойысының Өзен-Жетібай антиклин өңіріндегі газ кен орны. Жаңаөзен қаласының батысында 30 км жерде орналасқан. 1985 жылы ашылған.

Геологиялық құрылымы

Құрылым өлшемдері 7x2 км, солтүстік-батысқа созылған, солтүстігінен бұзылыспен шектелген брахиантиклин. Газ жатыны доломиттерден, туфты құмтастардың қабатшаларын кіріктіретін доломиттенген әктастардан құралған ортаңғы триас шөгінділеріннен орын алған.

Жатыс сипаты

Жатын қойнауқаттық, тектоникалық және литологиялық тұрғыдан қалқаланған. Жарықшақты жинауыштарының ашық кеуектілігі 0,85, газға қаныққандығы 85%. Өнімді горизонттардың жатыс тереңдігі 4074 м, су-мұнай жапсарының абсолют белгісі -4088 м. Жатынның биіктігі 170 м, горизонттың жалпы және тиімді қалыңдығы 30 м, газға қаныққан қалыңдығы 24,7 м, қысымы 50,4 МПа. 15 мм-лік штуцердегі газдың шығымы 38 мың м³/тәу, конденсаттікі 11 м³/тәу.

Құрамы

Газ құрамында метан (83,6%), ауыр көмірсутектер (16,2%-ға дейін), азот (0,2%), көмірқышқыл газы (0,2%) бар. Тұрақты конденсаттың бастапқы мөлшері 22,76 г/м³, оның тығыздыгы 762 кг/м³. Кондесат құрамында 11,3% парафин бар. Сульфат-натрийлі типті қойнауқаттық суының тығыздығы 1012 кг/м³, минералдылығы 24,84 г/л, аз мөлшерде йод, бор, бром, стронций бар. Кен орнында жұмыс 1987 жылдан бері тоқтатылған.

Дереккөздер

1. Қазақстанның мұнай энциклопедиясы. 2 томдық - Алматы: "Мұнайшы" Қоғамдық қоры, 2005. ISBN 9965-9765-1-1