Моторлы атқыштар әскері жүрдек сауытты машиналармен автоматты атқыш қарулармен танкіге қарсы қолданылатын құралдармен жә

Моторлы атқыштар әскері – жүрдек сауытты машиналармен, автоматты атқыш қарулармен, танкіге қарсы қолданылатын құралдармен және басқа да қару-жарақпен жабдықталған құрлық әскерлерінің бір түрі. Моторлы атқыштар әскері броньды машиналармен қозғалып, жорықта ұзақ жол жүруге бағытталған, ұрыс аймағында икемді әрі шапшаң қимылдар (маневр) жасайды. Қару-жарақпен, техниканың барлық түрімен, ракеталық, ядролық қарумен жабдықталған моторлы атқыштар әскері авиациямен бірлесе әрекет жасай отырып, ұрыстың бір түрінен екінші түріне тез ауыса алады. Олардың кез келген жау қорғанысын бұзып өтуге, аз уақыт ішінде жау тылына басып кіруге мүмкіндігі зор. Қазіргі кездегі ұрыс жағдайында шапшаң ілгерілей алатын моторлы атқыштар әскері танк әскерлерімен тығыз байланыста қимылдайды. Моторлы атқыштар әскері машиналармен, жаяу жүріп те, қажет болған жағдайда танкілерге ілесіп те ұрыс қимылдарын жүргізеді. Моторландырылған бөлім мен бөлімшелер және ұшақпен десант ретінде түсірілуі де мүмкін. Олар негізгі күштен бөлініп, ұзаққа созылатын ұрыстар жүргізе алады. Бұрынғы кездегі жаяу әскерлердей тәулігіне 30 – 50 км емес, бірнеше жүз шақырым жүре алады. Моторландырылған атқыштар құрамында ракеталық бөлімшелер бар. Осыған байланысты моторландырылған дивизияның қуаты анағұрлым артты. Моторлы атқыштар әскерінің атыс қуаты да күшейді. Ұйымдастырылуы жағынан моторлы атқыштар әскері моторлы атқыштар құрамаларынан, бөлімдер мен бөлімшелерден тұрады.

Дереккөздер

Қазақ энциклопедиясы

Қазақстан энциклопедиясы, VI-том

Бұл — мақаланың бастамасы.
Бұл мақаланы толықтырып, дамыту арқылы, Уикипедияға көмектесе аласыз.
Бұл ескертуді дәлдеп ауыстыру қажет.

[source1-1] Қазақстан энциклопедиясы, VI-том