Жаужүрек Мың бала

«Жаужүрек мың бала» — Ақан Сатаевтың көркем драмалық фильмі. Фильмнің тұсауы Қазақстанда 2012 жылы 3 мамырда кесілді.

Жаужүрек мың бала
Жанры	көркем драмалық фильм
Режиссёрі	Ақан Сатаев
Продюсері	Ескендір Нұрберген Әлия Увальжанова
Сценарийдің авторы	Жайық Сыздықов Мұхамед Мамырбаев
Басты рөлдерде	Асылхан Төлепов Берік Айтжанов Тілектес Мейрамов Болат Әбділманов Аян Өтепберген .
Операторы	Хасан Қыдыралиев
Композиторы	Ренат Гайсин
Кинокомпания	Шәкен Айманов атындағы АҚ «Қазақфильм» киностудиясы,
Бюджеті	$ 12 млн.
Кассалық түсімі	147 млн. 600 мың. теңге
Мемлекет	Қазақстан
Тілі	қазақша орысша (дубляж)
Шыққан жылы	2012
IMDb	ID 1852040

Фильмнің ұраны — «Туған ел, сүйген жар, намыс үшін от кешкендер»

Фильм туралы

Фильм қазақ халқы жоңғар шапқыншылығына қарсы ерлікпен күрескен XVIII ғасырдың бірінші жартысын қамтиды. Сол кезде қазақ жасақтары бірігіп, басқыншыларға тойтарыс беріп, майданда шешуші жеңістерге жеткен еді.

Кино желісі бойынша, осы соғыста ел үшін күрескен жауынгер ер-азаматтар қатарында, жаужүрек Сартай батыр да өзіндей өрімдей жас, жеткіншек сарбаздарды ту көтеріп, жорыққа бастап шығады. Мың бала атанған Сартай жасағы қарасы әлдеқайда көп жауға азғана қол қарсы шауып, арасалмақты қазақ әскері пайдасына өзгертеді.

Сюжеті

Фильм сюжетінің негізіне жоңғарларға қарсы күресте ересек сарбаздармен бірге кең-байтақ жері мен елін қорғауға бел буған өжет те жас мың жауынгер туралы аңыз желісі алынған. Бейнефильм XVIII ғасырдың бірінші жартысында - қазақ тарихының бетбұрыс кезеңінде, жоңғарлармен қанды соғыста қазақ халқының бірлігі мен батырлығы еркіндік алу жолында шешуші күшке айналған кезде орын алады. Сюжетке сәйкес, қатыгез күресте ересектермен қатар, батыл Сартай бастаған жас жауынгерлер туған жерін қорғауға шықты. Оның аты аңызға айналған әскері "Мың бала" ретінде, жаумен тең емес шайқасқа түсіп, соғыс барысын өзгертті. Бұл шайқас фильмде шешуші факторға айналып, қазақ халқының тарихында "Аңырақай шайқасы" деп танылған.

Рөлдерде

Актер	Рөлі
Асылхан Төлепов	Сартай батыр
Аян Өтепберген	Таймас
Әлия Әнуарбек	Зере
Тілектес Мейрамов	Назар
Төлеубек Аралбай	Рахымжан
Нұрлан Әлімжанов	Қасым
Берік Айтжанов	Әбілқайыр хан
	Қорлан

Түсірілім барысы

Фильм күрделі климаттық жағдайларда түсірілді. Фильмді түсіруге атсалысқан топ 90 күн ішінде төрт локация мен 11 декорация ауыстырған. Түсірілім 2011 жылы ақпанда Қапшағай аймағында басталған болатын. Көктемде түсіру тобы Шарын шатқалы аумағына, сосын Қапал-Арасанға орналасты.

"Қазақфильмде" мәлімдегендей, "Жаужүрек мың бала" фильмі жайлы ақпарат түсірілім басталмай-ақ елге тарап кетті. Жалпы республикалық іріктеуге басты және қосалқы рөлдерге түсу үшін 22 мың 200 үміткер қатысты. Түсірілім алаңында бес жүзге тарта отандық БАҚ, сонымен қатар «The Independent», «Hollywood Reporter», «Variety» секілді әлемдік ірі медиа өкілдері де болды. Фильм түсіру барысында ауа райына қатысты кейбір кедергілер болды. Өйткені түсірілімнің 90 пайызы далада жүргізілді. Актерлер екі ай бойы актерлік шеберліктерін шыңдап, атпен шабуды, садақ тартуды меңгерді. Фильмді дайындауға жалпы саны 15-тей мемлекет атсалысты, со­ның ішінде дыбыс монтажы Францияда жүргізілді.

Қазір әлемдік дистрибьюторлармен келіссөз жүргізіліп жатыр.

Түсіруші топ

• Өндіруші — Ш. Айманов атындағы «Қазақфильм» киностудиясы, «Компания Новый Киноформат»
• Режиссёрі — Ақан Сатаев
• Сценарий авторлары — Жайық Сыздықов, Мұхамед Мамырбаев, Тимур Жақсылықов
• Қоюшы-оператор — Хасан Қыдыралиев
• Продюсерлер — Әлия Увальжанова, Анна Качко

Канн кинофестивалінде

27 мамыр күні Францияның Канн қаласында 65-ші мерейтойлық кинофестивалінде «Алтын пальма бұтағы» бас жүлдесін тапсыру рәсімі өтті.

65-ші Канн кинофестивалінің аясында арнайы көрсетілген «Жаужүрек мың баланы» тамашалауға 40-тан астам агент пен дистрибьютер келген. Тарихи кинокартина сеансынан кейін оны америкалық нарыққа шығару туралы ұсыныс түсті. Сонымен қатар, «Жаужүрек мың баланы» әлемдік прокатқа шығарумен айналысатын канадалық компаниямен келісімге қол қойылды.

«Жаужүрек мың бала» фильмінің осы беделді халықаралық байқауда көрсетілуінен кейін әлемдік прокатқа шығаратын агент те анықталды. Қазақ тілінде түсірілген жоңғарлармен соғысқан жас жауынгерлердің тарихы, Аңырақай шайқасы, махаббат пен сатқындық, бостандық пен тәуелсіздікке деген ұмтылыс осының бәрі жақсы көрсетілген фильм көрерменнің барлығына түсінікті болып шықты. Фильмнің сюжеті, оның тарихы мен актерлердің шеберлігі Канн кинофестивалінде лайықты бағасын алды.

Ұлыбританияның кинопродюсері, Пьер Спенглер:

Фильмнің сапасы, актерлердің шеберлігі үлкен әсер қалдырды. Барлығы, эпикалық аясы, трюктері және басқа элементтері де жоғары деңгейде. Бұның барлығы көрерменді қызықтыруы керек. «Мың баланы» көрген сайын Қазақстанға баруға себеп іздеп, сонда бір фильм түсірсем деймін. Осындай сапалы кино мен үлкен әлеуетке ие қазақстандық кинематография саласы бағындырар биік әлі алда. Сәттілік тілеймін.

«TOKIO PIONIWA FILM» президенті, Такаши Нива:

Өте тамаша фильм! Көп нәрсе тарта білді, тарихи кезең жақсы бейнеленген, көрікті табиғи орындар көрсетіледі. Техникалық орындалуы мен фильм сапасы да керемет.

Дереккөздер

1. Көркем фильм бюджеті 12 млн АҚШ долларын құрады
2. [https://web.archive.org/web/20130311195254/http://www.zakon.kz/kazakhstan/4489546-film-zhauzhurek-myn-bala-sobral-za.html Мұрағатталған 11 наурыздың 2013 жылы. Мұрағатталған 11 наурыздың 2013 жылы. Мұрағатталған 11 наурыздың 2013 жылы. Мұрағатталған 11 наурыздың 2013 жылы. Мұрағатталған 11 наурыздың 2013 жылы. Мұрағатталған 11 наурыздың 2013 жылы. Фильм «Жаужурек Мын Бала» собрал за первые дни проката около миллиона долларов  (орыс.)]
3. «Жаужүрек мың бала» фильмінің тұсауы кесілді
4. Студия фильмдері: Жаужүрек Мың бала. kazakhfilmstudios.kz.
5. СЕНБАЕВА, Айнұр «Жаужүрек мың бала» – азаттықтың айнасы. "Алаш айнасы" газеті (3 маусым, 2012).
6. «Жаужүрек мың бала» фильмі Канн кинофестивалінде лайықты бағасын алды

Сыртқы сілтемелер

• Қазақфильм сайтында Жаужүрек мың бала туралы Мұрағатталған 23 желтоқсанның 2012 жылы.
• kinostan.kz сайтында фильм туралы Мұрағатталған 9 шілденің 2012 жылы.