Гауһартас 1975 жылы Қазақфильм студиясы түсірген көркем фильм Бүкілодақтық тұсаукесері 1977 жылы Мәскеуде өтті Сценариі

Гауһартас — 1975 жылы "Қазақфильм" студиясы түсірген көркем фильм. Бүкілодақтық тұсаукесері 1977 жылы Мәскеуде өтті. Сценариі Дулат Исабековтың әңгімесінің желісімен жазылды. Режиссері — Шәріп Бейсембаев.

Гауһартас
Храни свою звезду

Жанры	драма
Режиссёрі	Шәріп Бейсембаев
Сценарийдің авторы	Дулат Исабеков
Басты рөлдерде	Жанна Қуанышева, Әнуар Боранбаев
Операторы	Асхат Ашрапов
Композиторы	Анатолий Бычков
Кинокомпания	Қазақфильм
Ұзақтығы	83 мин.
Мемлекет	КСРО
Тілі	орыс
Шыққан жылы	1975

Сюжеті

Қарапайым шаруа шаңырағына бойжеткен Салтанат келін болып түседі. Шаруаның үлкен ұлы, белді шопан Тастанның жары атанған Салтанат жүрегі мейірімге толы жан. Салтанат келін болғалы бері, ол шаңыраққа мейірім мен жылулық сәулесі төгіледі. Салтанаттың жібек мінезіне ата-енесі де дән риза болады. Қайыркен де жеңгесіне еркелеп, онымен жақсы дос болады. Тек мінезі ауыр Тастан ғана Салтанатқа қатаң қарайды. Ер-азаматының мейіріміне бөлене алмаған Салтанат ауыр дертке шалдығады.

Қызық фактілер

«Гауһартас» және «Салтанаттың әні» атты әндерді әнші Сажида Ахметова орындаған.
Фильмнің режиссері — Шәріп Бейсембаев Салтанат келіннің бейнесін сомдайтын актриса іздеу мақсатында үлкен кинобайқау ұйымдастырады. Іріктеуге бағын сынау мақсатымен оныншы сынып оқушысы Жанна Қуанышева келеді. Сол шақта жас актриса Болат Мансұровтың «Махаббат туралы өсиет» фильміне түсіп үлгерген. Кинобайқаудан өткен ол бірден басты рөлге бекітіледі. Алайда, Жанна Қуанышева басты бұл рөлге келіспеген. Себебі, мектеп бітіру сынақтарын тапсырып, жоғары оқу орнына түсу емтиханына дайындалу керек болатын. Бірақ, балғын қызға фильм режиссерлерінің ассистенттері қайта-қайта хабарласып, өтініш айтады. Өтінішті табан астына қалдырмаған Жанна Қуанышева қазақ келінінің бейнсін тамаша сомдап береді.
Режиссер басты кейіпкер Тастан бейнесін сомдайтын актерді ұзақ іздейді. Іріктеуге келген актерлердің ешбірі режиссер көңілінен шықпаған. Күндердің күнінде түсіру алаңына Әнуар Боранбаев келеді де, іздегенін тапқандай болған Шәріп Бейсембаев бірден Әнуар Боранбаевқа киноға түсу туралы ұсынысын айтып, басты рөлге бекітеді.

Рөлдерде

Салтанат — Жанна Қуанышева
Тастан — Әнуар Боранбаев
Қайыркен — Сапарғали Жәкішев
Тастанның анасы — Әмина Өмірзақова
Тастанның әкесі — Кәукен Кенжетаев
Әскербек — Досхан Жолжақсынов
Раушан — Гүлзия Белбаева
Айша — Лидия Ашрапова
Қауен — Кененбай Қожабеков
Парторг — Бәйтен Омаров

Дереккөздер

"Гауһартас" - қазақ киносының алтын тірек
Храни свою звезду (1975)

[1] "Гауһартас" - қазақ киносының алтын тірек

[2] Храни свою звезду (1975)