Аққала халық театры

Аққала халық театры — селолық клуб меңгерушісі Әния Рахметова 1970 ж. ұйымдастырған драма үйірмесі негізінде қалыптасқан. Үйірме жұмысына мәдениет қызметкерлері, мектеп мұғалімдері, механизаторлар қатысқан. Шығармашылық ұжым 1981 ж. драматург-жазушы Қ.Кемеңгеровтың “Алтын сақина” пьесасын сахналап, “Халық театры” атағын жеңіп алған. Спектакльді дайындауға режиссерлік қызмет атқарған жазушы, драматург, аудан түлегі Е.Домбаев, клуб меңгерушілері Ә.Рахметова, Е.Масатов еңбек сіңірген. Театр ұжымы Қ.Мұхамеджановтың “Құдағи келіпті”, Т.Ахтановтың “Күшік күйеу” пьесаларымен 1990, 1995 жылдары байқауларға қатысып, халықтық атағын сақтап қалған.

Халық театрына әр жылдары Н.Құлбаев, А.Кенжәлиев, А.Каримова, О.Мырзағалиева, М.Қосжанов режиссер, С.Мұхамеджанов, Б.Дүйсенғалиева суретші болды. Қойылымдарда -Қ.Қидашева, К.Ибрашева, Е.Есқайыров, М.Абилова, Қ.Кәрімова, А.Ізімова, М.Әділова, Ә.Халенова, А.Жанаева, А.Мұстафин, Ж.Құспанов, Б.Қамиев, Ғ.Сұлтанов, К.Құлжанова, Н.Естұрғанова, Қ.Жоңқарбаева әр түрлі рольдерді орындаған.

Дереккөздер

1. Индер ауданы, «Арыс» баспасы Алматы, 2006 ISBN 9965-17-273-0