Ұлттық продюсерлік орталық мемлекеттік кино мекемесі ТарихыҚР үкіметінің 1996 жылғы 20 тамыздағы Ш К Айманов атындағы Қа

Ұлттық продюсерлік орталық — мемлекеттік кино мекемесі.

Тарихы

ҚР үкіметінің 1996 жылғы 20 тамыздағы «Ш.К.Айманов атындағы «Қазақфильм» шығармашылық-өндірістік ұйымын қайта құру» туралы қаулысына сәйкес мекеме Ш.К.Айманов атындағы Қазақ кинофабрикасы және Ұлттық продюсерлік орталық болып екіге бөлінді.

Көп ұзамай Қазақстан киноматографиясын дамыту және ұлттық фильмдерді прокатқа шығарып, көрсетуге жағдай тудыру мақсатымен 1996 ж. қазан айында «Қазақкино» мемлекеттік компаниясы құзырында Ұлттық продюсерлік орталық жеке мекеме ретінде ұйымдасты. Оның ақшалай қоры мемлекеттік бюджет, оған қоса инвесторларды тарту, сондай-ақ өзге қаржы көздері есебінен құралды. 1999 ж. қаңтар айында Ұлттық продюсерлік орталық ҚР Білім, мәдениет және денсаулық сақтау министрлігінің республикалық мемлекеттік қазыналық кәсіпорнына айналды. Ол қазақ киносын дамытып өркендету, жаңа кинотуындыларын жасауға инвестиция тарту, республикада ұйымдастыру ісін жетілдіру, халықаралық байланысты орнықтыру, отандық кино жасаушылар мүддесін қорғау, т.б. жұмыстармен айналысып, толық және қысқа метражды көркем, деректі, ғылыми-көпшілік, киношежірелік, оқу және анимациялық фильмдерді сонымен қатар видео, телевизиялық пен көп сериялы кинотуындылар, жарнамалық роликтер шығару өндірісін, оларды прокаттау мен тарату ісін ұйымдастырды.

Ұлттық продюсерлік орталықтың басқа студиялармен бірлесіп шығарған фильмдері қатарында “Заман-ай” (реж. Б.Шәріп), “Киллер” (реж. Д.Өмірбаев), “Омпа” (реж. С.Нарымбетов), “Тауқымет” (реж. Ұ.Қолдауова), “1997” (реж. А.Әмірқұлов), “Фара” (реж. А.Қарпықов), “Ағайынды үшеу” (реж. С.Апрымов), т.б. көркем, сондай-ақ деректі анимациялық киноленталар бар. Әр жылдары бұл фильмдердің көпшілігі Франция, Италия, Жапония, Иран, Ресей, Украина, Үндістан секілді елдерде өткен халықаралық кинофестивальдардың түрлі жүлделерін иеленді. 2000 ж. 28 наурызда Ұлттық продюсерлік орталық Ш.К.Айманов атындағы Қазақ кинофабрикасы мен Қазақ кинопрокаттың бірігуі нәтижесінде Ш.К.Айманов атындағы «Қазақфильм» Ұлттық компаниясы болып қайта құрылды. Бұған қоса, 2005 ж. мамыр айында «Қазақстан киномотографияшылары одағының продюсерлік орталығы» (директоры И.А.Вовнянко) құрылған. Ол фильмдерге продюсерлік жасау, деректі және көркем фильмдер шығару, кинофестивальдарды ұйымдастырып, өткізу ісімен шұғылданады. 2006 ж. осы орталық арқылы грантымен «Ұлттық қор. Есепшот №...» атты деректі фильм шығарылды.

Дереккөздер

Қазақстан Ұлттық энциклопедиясы

[1] Қазақстан Ұлттық энциклопедиясы