Тюрингит

Тюрингит — силикаттар класындағы тотыққан хлориттер тобының минералы. Жуықтап алғандағы : (Fe2+, Fe3+)3 Al2Sі2O10 (OH)2 (Mg, Fe)3 (OH)6. Химиялық құрамы тұрақты емес: FeO – 19,8 – 42,3%, Fe2O3 – 0,6 – 31,7%, Al2O3 – 13 – 23,61%, SіO2 – 19,4 – 29%, H2O – 4,6 – 13%. Моноклиндік сингонияда кристалданады. Тюрингит тұтас, ұсақ түйірлі масса күйінде кездеседі. Түсі күңгірт қоңыр, кейде қара. Қаттылығы Моос шкаласы бойынша 2–2,5, тығыздығы 3,03–3,40 г/см³. Жымдастығы жетілген. Темірлі кварциттердің метаморфизмінен, магмалық тау жыныстары темірлі силикаттарының гидротермалды өзгеруінен түзіледі. Дүние жүзіндегі ең ірі кен орны Тюрингияда (Германия), Қазақстандағы мол шоғыры Қаражал кенінде орналасқан. Темір кентасы ретінде пайдаланылады. Халықаралық минералогия ассоциациясы комиссиясының шешімімен "Тюрингит" термині жойылып, барлық темір хлориттері бір минералдық түр – шамозитке біріктірілді.

Дереккөздер

1. Қазақ Энциклопедиясы, 8 том.