С Мұқанов атындағы Солтүстік Қазақстан облыстық қазақ музыкалық драма театры Петропавл қаласындағы мәдени сахналық ұжым

С. Мұқанов атындағы Солтүстік Қазақстан облыстық қазақ музыкалық драма театры – Петропавл қаласындағы мәдени-сахналық ұжым.

С. Мұқанов атындағы Солтүстік Қазақстан облыстық қазақ музыкалық драма театры

Орналасуы	Қазақстан Петропавл
Негізделгені	2000
Директоры	Біржан Жалғасбаев
Көркемдік жетекшісі	Дәурен Тойбазаров
Бас дирижёрі	Марат Жақыпов
Бас балетмейстері	Жанна Темербаева

Тарихы

Театр 2000 жылы жазушы С. Мұқановтың 100 жылдық мерейтойымен тұспа-тұс ашылғандықтан жазушы есімі беріліп, шымылдығын 15 маусымда С. Мұқановтың "Аққан жүлдыз" спектаклімен ашты. 2000-2005 жылдары ұжымның бас режиссері, әрі директоры О. Ақжарқын-Сәрсенбек, суретшісі А. Сырбаева, алғашқы актерлері Қазақ ұлттық өнер академиясының түлектері болды.

Қойылымдары

Театр репертуарында: Ш. Айтматовтың "Шыңғыс ханның ақ бұлты" бойынша, М. Хасеновтың "Пай, пай, жас жұбайлар-ай", С. Жүнісовтің "Қысылғаннан қыз болдық", "Елім-ай", С. Сматаевтың "Көгілдір такси", Ғ. Мүсіреповтің "Қозы Көрпеш-Баян сұлу", С. Ваннустың "Иірім", Б. Ұзақовтың "Үміт", П. Мерименің "Кармэн", т.б. бар. Театрда Жастар одағы сыйлығының иегерлері Н. Мағавина, А. Алтыбаева және актерлер Б. Жалғасбаев, М. Құсайынов, Д. Саудов, Е. Шүкіров, т.б. еңбек етеді.

Театр бүгінгі таңда "Бір түп алма ағашы" (авторы және режиссері Қазақстанға еңбегі сіңген өнер қайраткері Ә. Оразбеков), Абайдың "Қара сөздері", Р. Мұқанова "Мәңгілік бала бейне", Т. Ахтанов "Күшік күйеу", Т. Нұрмағамбетов "Бес бойдаққа бір той" (режиссері М. Ақжолов), М. Задорновтың "Күйеуіңізді сатыңызшы", М. Әуезовтің "Еңлік -Кебек", Т. Улиямс "Шыны хайуанат" (режиссері Б. Шамбетов), К. Гольдонидің "Екі қожаға бір қызметші" (режиссері Ресей мен Қазақстанға еңбегі сіңген өнер қайраткері Б. Н. Преображенский), М. Жұмабаевтың "Батыр-Баян" (режиссері М. Оспанов Қазақстанның еңбек сіңірген қайраткері), С. Мұқановтың "Балуан Шолақ" повесінің желісімен жазылған Д. Исабековтің "Жау жүрек" (режиссері Жанат Хаджиев, Қазақстан Республикасының еңбек сіңірген қайраткері, Тәуелсіз платиналы "Тарлан" сыйлығының иегері), Ә. Таразидің "Жақсы кісі" (режиссері Ғ. Баязитов), Н. Байтеміровтің "Абайлаңыз қалыңдық" (режиссері Б. Шамбетов), О. Богаевтың "Down-Way" (режиссері Б. Әбдірхманов), А. Богачеваның "Эйр-Балалық", Т. Жүжженоғлының "Тығырық", С. Жүнісовтың "Елім-ай", Ш. Башбековтың "Шойын қатын" осындай қырықтан астам қойылымдармен көрермен көк жиегін кеңейтіп, сырбаз сахна сан қырлы сәулесін шашты. Театр жан-жақты рухани ізденіс үстінде, заманауи құрал жабдықтармен толық қамтамасыз етілген. Облыс пен қалаларға, аудан-аймаққа гастрольдік сапармен өнер сабақтастырып, халықпен тығыз байланыста болып, өнер биігінен өз жолын салып барады.

Жетістіктері

Театр ұжымы 2001 жылы Республикалық театр фестивалінде М. Баджиевтің "Қылмысты оқиға" спектаклімен Бас жүлдені жеңіп алды.
2002 жылы Ғ. Мүсіреповтің туындыларына арналған Х-шы Республикалық театр фестивалінде Б. Жалғасбаев пен Н. Мағауина «ең үздік Қозы» және "Ең үздік Баян" номинациясын жеңіп алды. Аталмыш жылы актер Б. Жалғасбаев Президенттің Құрмет грамотасымен марапатталды және сол жылы актрисалар Н. Мағауина және А. Алтыбаева "Қазақстан Жастар сыйлығының лауреаты" атағын алды.
Театр 2003 жылы Каирде өткен XV-Халықаралық театрлар фестивалінде Ғ. Мүсіреповтың "Қозы көрпеш-Баян сұлу" пьесаның желісі бойынша жасалған "Шың басында" атты экспериментті қойылымымен қатысып, үздік ондық қатарынан орын еншілеп, Құрмет грамотасымен марапатталды.
2004 жылы XII-ші Республикалық театрлар фестиваліне М. Ғаппаровтың "Қуыршақ немесе қызғаншақ қыздардың кеші" қойылымымен қатысып Оразәлі Ақжарқын-Сәрсенбек "Үздік режиссер" номинациясын еншіледі. Сол жылы Елбасы Н.Ә. Назарбаевтың ұсынысымен, ЮНЕСКОның қолдауымен Астана қаласында өткен VII-ші Халықаралық жастардың шағармашылық "Шабыт" фестивалінде П. Мерименің "Кармен" қойылымымен қатысып, сахнагер Н. Мағауина "Ең үздік әйел бейнесі" номинациясын жеңіп алып, фестиваль лауреаты атанды және "Театр тартуы" номинациясы бойынша театр III-ші орынға ие болды.
2005 жылы Қызылорда қаласында өткен Қ. Жандарбеков пен Қ. Байсейітовтың 100 жылдық мерейтойына орай ұйымдастырылған XIII-ші Республикалық театралдық фестиваліне Д. Исабековтың "Тыныштық күзетшісі" қойылымымен қатысып, сахнагер Е. Шүкіров "Үздік ер адам бейнесі" номинациясын иеленді.
2006 жылы театр басшысы Қ. Қасымов пен театрдың көркемдік жетекші Б. Жалғасбаев Қазақстан Республикасы Мәдениет және ақпарат министрлігінің Құрмет белгісі "Мәдениет қайраткері" атағын алды.
2008 жылы Ақтау қаласында өткен Н. Жантөриннің 80-жылдық мерейтойына арналған XVI-шы Республикалық театралдық фестиваліне А. Володиннің "Қос жебе" қойылымымен қатысып 2-ші орынды еншіледі.
"Down-Way" спектаклі Екатеринбург қаласында өткен "Коляда-Plays" қазіргі заманғы драматургия халықаралық театр фестивалінде арнаулы сыйлықпен атап өтілді. Сондай-ақ "В ногу современем" эксперимантальді спектакльдеріне арналған аймақтық театр фестивалінде "Үздік актерлік ансамбль" номинациясын жеңіп алды. Театр жанына "Алуа" атты би тобы мен камералық оркестр құрылған. Оның құрамындағы әртістер театр қойылымдарына да қатысады.

Актерлік құрамы

Сұпатаева Аида, Разиев Асылхан, Гайнулина Гүлнәз, Тәшкен Дулат, Дұрысбеков Тұрақ, Мусина Құртқа, Уәлиева Зарина, Каримов Әділжан, Қасым Айбол, Асқаров Нұрбол, Адыкенов Думан, Кәмшәт Қабошева, Ислам Жақсылық, Бегалина Жанар, Серкебаева Мақпал, Асқарова Гүлдана, Алет Гүлмира.

Галерея

Дереккөздер

Қазақ мәдениеті. Энциклопедиялық анықтамалық. Алматы: “Аруна Ltd.” ЖШС, 2005 ISBN 9965-26-095-8
Қазақстанның мәдени ошақтары. Культурные центры Казахстана: Фотоальбом. – Алматы:«АСА» Баспа үйі» ЖШС, 2012. – 288 б. (қазақ, орыс, тілдерінде) ISBN 978-601-80325-0-9

Театр сайты

https://kaz-teatr.kz/

[1] Қазақ мәдениеті. Энциклопедиялық анықтамалық. Алматы: “Аруна Ltd.” ЖШС, 2005 ISBN 9965-26-095-8

[2] Қазақстанның мәдени ошақтары. Культурные центры Казахстана: Фотоальбом. – Алматы:«АСА» Баспа үйі» ЖШС, 2012. – 288 б. (қазақ, орыс, тілдерінде) ISBN 978-601-80325-0-9