Оперативтік өнер

Оперативтік өнер (оперативное искусство) — қарулы күштер түрлерінің, бірлестіктерінің біріккен және жеке операцияларын (жауынгерлік қимылдарын) дайындау және жүргізу тарихы мен практикасын қамтитын әскери өнердің құрама бөлігі. Оперативтік өнер стратегия мен тактиканың аралығын қамтиды. Стратегиянын талаптары мен жағдайлары оперативтік өнер үшін негіз болып саналады, ал ол өз кезегінде тактика дамуының міндеттері мен бағыттарын анықтайды. Керісінше қарым-қатынастар да болуы мүмкін. Қару-жарақтың, әскери техниканың, әскери құрылымды ұйымдастырудың, әскери қимылдарды жүргізу тәсілдерінің өзгеруі әсерінен оперативтік өнер мен тактиканың, стратегияның өзара қарым-қатынасы соғүрлым көп қырлы және өзгерісті болады. Оперативтік өнер теориясының негізгі мақсаттары — қазіргі заманғы операциялар (жауынгерлік қимылдар) заңдылықтарын, мазмұнын және сипатын зерттеу; оларды дайындау және жүргізу әдістерін жасау; қарулы күш түрлері құрамаларының бірлесе қимылдауының әдістері мен тәсілдерін белгілеу және олардың үздіксіз бірге қимылдауын ұйымдастыру мен басқару; қарулы күш түрлері құрамаларын қаруландыру мен ұйымдастырудагы талаптарды анықтау; ескерлерді басқару құрамдары мен органдары офицерлерінің оперативтік дайындығының мазмұны мен әдістерін белгілеу; әскери қимыл театрларын оперативті жабдықтау туралы ұсыныстар жасау.

Дереккөздер

1. Қазақ тілі терминдерінің салалық ғылыми түсіндірме сөздігі: Әскери іс. Алматы: «Мектеп» ААҚ, 2001 жыл