Маугли

Маугли – қасқырлар асыраған үнді баласы. Кішкентай бала қасқыр апанына қорықпай кіріп, оның бөлтіріктерімен бірге айбатты Ракшаны еме бастайды. Оны осылайша қаншық қасқыр бөлтіріктерімен бірге бауырына алып, асырайды. Мауглиді аңшылық кәсібіне баулиды. Балу деген аю оған джунгли заңдарын үйретеді. Сөйтіп, бөрі-бала құстар мен жыландардың тілін түсініп, әрбір шөп сыбдыры мен жапырақ қыбырының мәнісін біле бастайды. Ол қабыланша ағашқа өрмелеуді, балықша суда жүзуді және маймылша бұтақтан бұтаққа секіруді үйренеді. Маугли жайлы кітапта жануарлардың іс-әрекеті бейнеленеді. Алайда олар да адам секілді жақсы көру мен жек көруді, қастық жасауды, тіпті аңыз айтуға дейін біледі. Адамзат ұрпағы Маугли мен жабайы аңдар бірдей бір әділ заңға бағынып өмір сүреді. Бұл заңды тек қана қанішер тарғыл жолбарыс – Шер-Хан бұзбақ болады. Шер-Хан – Мауглидің ең қатерлі жауы. Маугли хикаясы, негізінен, тағы баланың осы жолбарыспен айқасқа шығу тарихы болып табылады. Шер-Хан Мауглиді оның қаршадай кезінен бастап аңдиды және әрқашанда жолына кесе-көлденең тұрады. Алайда Маугли одан қорғана біледі, ақыр аяғында тарғыл жауын жеңіп шығып, оның терісін Мәміле жартасына алып келеді. Адал достарының көмегі болмаса Маугли Шер-Ханды жеңе алмас еді. Бұл достары, ең алдымен өзінің бөрі-бауырлары, одан кейін ақылды аю Балу, джунглидегілердің бәрі сескенетін қара қабылан Багира, сондай-ақ ержүрек қасқыр Акела, айдаһар жылан Каа және Мауглиді өзінің туған баласындай көрген ауылдағы шаруа әйел болатын. Оқиға соңында адам джунглидегілердің бәрінен де құдыретті болып шығады. Оның отты көзіне ешбір қасқыр, тіпті сымбатты Багира да тіктеп қарай алмайды. Себебі ол – бүкіл джунгли патшасы. Ержеткен Маугли кейін адамдар арасына қайтып оралады, бірақ ол бәрібір сол джунглидің қожасы болып қалады. Маугли хикаясы ағылшын жазушысы Редьярд Киплингтің хайуанаттар өмірі жайында жазған әйгілі “Джунгли кітабында” баяндалады. Киплингтің өзі Үндістанның Бомбей қаласында туып, балалық шағын сонда өткізген. Орта мектепті Англияда оқып бітіргеннен кейін туған жеріне қайта оралып, онда ұзақ жылдар бойы тұрған. Ол бұл өлкенің жергілікті тұрғындары болып табылатын үнділердің тұрмыс-салт, әдет-ғұрыптарын, аңыздарын жетік білді. Солардың бірі қасқырлар асыраған үнді баласы жайындағы аңыз еді. соның негізінде “Маугли” ертегісін жазды.

Дереккөздер

1. , 6 том.