Венесуэлалықтар

Венесуэлалықтар — Венесуэла Республикасының тұрғын халқы. Жалпы саны 23,6 млн. (1998). В-дың 20%-і ақ нәсілділер, 9%-і зәңгілер, қалған 69%-і араласқандылар, мулаттар, самболар. В. испан тілінің латынамерикалық диалектісінде сөйлейді. Басым көпшілігі христиан дінінің католик ғұрпын ұстанады да, аздаған бөлігі протестанттар мен мормондар. В. испан, баск халықтарының үнді, зәңгі тайпаларымен ассимиляцияға түсуі негізінде қалыптасты. Зәңгілер мен мулаттар теңіз жағалауын мекендесе, араласқандылар (метистер) елдің солт.-батысындағы таулы өңірлерде, самболар Льяноста тұрды. В-дың төрттен бірі а. ш-нда, үштен бірі өнеркәсіпте, кейбірі тұрмыстық қызмет көрсету саласында еңбек етеді. В., әсіресе, араласқандылары пальма жапырағынан, шиден тоқып, өріп түрлі бұйымдар жасап, тері өңдеумен, қыш құмыра жасаумен, әр түрлі кәсіптермен шұғылданады. В-дің ескі қалаларында испан үлгісіндегі үйлер көп кездеседі. Ауылдық жерлерде тұратын шаруалар үйлерін кірпіштен, саз балшықтан тұрғызып, шатырларын жұқа қыш немесе пальма жапырағымен жабады. Көбіне ауладағы бағаналарға орнатылған аспалы торда ұйықтайды. Ұлттық киімдері: ерлер мақта матадан тігілген кең балақты шалбар, жейде, шиден тоқылған сомбреро, жеңіл аяқ киім (сандал) киеді. Әйелдері бастарына жаулық жауып, көйлектерін ұзын да кең етіп тігеді. Ұлттық тағамдары, көбіне, жүгеріден даярланады. Оған “арепа” аталатын тоқаш, масаморра ботқасы, жүгері ұнынан дайындалған альяка тағамы жатады. Чича ішімдігін пайдаланады. Фольклорынан, ұлттық той-мерекелерінен испандықтармен қоса, жергілікті үндіс халқының, африкалықтардың да әсері байқалады. Спорттың көптеген түрімен қатар, бұқа сүзістіріп, қораз төбелестіріп те көңіл көтереді. Ұлттық муз. аспаптары куатроның сүйемелдеуімен гуарачас биін билейді. “Тернера” деп аталатын отбасылық мерекелері бар.

Дереккөздер

1. «Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 жыл, ISBN 5-89800-123-9, II том