Балалар ауруханасы

Балалар ауруханасы — ауру балаларды емдеуге арналған медициналық мекеме. Қазақстанның облыс орталықтары мен ірі қалаларында көп салалы және арнайы Балалар ауруханасы бар. Оның ішінде республика дәрежедегілері — Алматыдағы республика клиникалық Балалар ауруханасы мен Педиатрия және балалар хирургиясы ғылыми орталығының клиникасы. Балалар ауруханасындағы орын саны 200-ден 450-ге дейін болады. Ондағы емдік шаралар ауру түріне, баланың жасына байланысты қолданылады. Арнайы ауруханаларда жеке ауру түрлері бойынша (мысалы, жұқпалы аурулар, туберкулез, психикалық аурулар, т.б.) емдеу жүргізіледі. Балалар ауруханасында жаңа туған нәрестеден 18 жасқа дейінгі балаларды аурудан алдын ала сақтандыру шаралары жүргізіледі, ауру балаларға емханада және үйде дәрігерлік көмек көрсетіледі.

Дереккөздер

1. «Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 ISBN 5-89800-123-9, II том;