ҚазАвтоЖол халықаралық және республикалық маңызы бар автомобиль жолдарын басқару жөніндегі Қазақстан Республикасының Ұлт

ҚазАвтоЖол — халықаралық және республикалық маңызы бар автомобиль жолдарын басқару жөніндегі Қазақстан Республикасының Ұлттық операторы.

"ҚазАвтоЖол" ұлттық компаниясы
Түрі	акционерлік қоғам
Қызметі	автомобиль жолдарын басқару
Құрылды	1 ақпан 2013 жыл
Орналасуы	Қазақстан, Астана қаласы, Сығанақ көшесі 60/4 "Абу Даби Плаза"
Басты адамдары	Басқарма төрағасы - Дархан Серікұлы Иманашев
Сайты	kz.qaj.kz

Ұлттық операторға халықаралық және республикалық маңызы бар автомобиль жолдарын салу, қайта жаңарту, жөндеу, күтіп ұстау және автомобиль жолдары бойындағы қызмет көрсету нысандарын дамытуды бақылау функциялары жүктелген. Сонымен қатар «ҚазАвтоЖол» – ақылы жолды ұйымдастырушы компания.

Қоғамның құрылтайшысы – Қазақстан Республикасының Үкіметі (Қазақстан Республикасы Қаржы министрлігінің Мемлекеттік мүлік және жекешелендіру комитеті атынан). 2023 жылдан бастап Қоғамның 100% мемлекеттік акцияларының пакетін иеленуші және пайдалану құқығын жүзеге асыратын мемлекеттік орган – Қазақстан Республикасы Көлік министрлігінің Автомобиль жолдары комитеті (Жалғыз акционер).

Қоғам қызметін қаржыландырудың негізгі көздері республикалық бюджет қаражаты және мемлекеттік кепілдікпен тартылатын және республикалық бюджет қаражаты есебінен толық көлемде өтелетін мемлекеттік емес қарыздар, сондай-ақ автомобиль жолдарының ақылы учаскелерінің алымдары болып табылады.

Тарихы

ҚР Үкіметінің 1998 жылғы 9 желтоқсандағы № 1266 Қаулысымен Облыстық автомобиль жолдары қазыналық кәсіпорындары мен "Инжирингавтожол" республикалық мемлекеттік қазыналық кәсіпорны біріктіріліп, "Қазақавтожол" республикалық мемлекеттік қазыналық кәсіпорны құрылды.

ҚР Үкіметінің 2013 жылғы 1 ақпандағы № 79 Қаулысымен Көлiк және коммуникация министрлiгi Автомобиль жолдары комитетiнiң «Қазақавтожол» шаруашылық жүргiзу құқығындағы республикалық мемлекеттiк кәсiпорнының «Қазақавтожол-Көкшетау» еншiлес мемлекеттiк кәсiпорны қайта ұйымдастырылып, жарғылық капиталына мемлекет жүз пайыз қатысатын «ҚазАвтоЖол» акционерлік қоғамы болып құрылды.

ҚР Үкіметінің 2013 жылғы 30 шілдедегі № 744 қаулысымен "ҚазАвтоЖол" акционерлік қоғамы Автомобиль жолдарын басқару жөніндегі ұлттық оператор болып белгіленді.

ҚР Үкіметінің 2013 жылғы 21 тамыздағы № 822 қаулысымен «ҚазАвтоЖол» акционерлік қоғамы «ҚазАвтоЖол» ұлттық компаниясы» акционерлік қоғамы болып қайта аталды.

ҚР Үкіметінің 2017 жылғы 23 маусымдағы № 393 қаулысымен Инвестициялар және даму министрлігі Автомобиль жолдары комитетінің "Қазақавтожол" шаруашылық жүргізу құқығындағы республикалық мемлекеттік кәсіпорны жарғылық капиталында мемлекеттің 100% қатысу үлесі бар "Қазақавтожол" жауапкершілігі шектеулі серіктестігі болып қайта ұйымдастырылды.

Президент 2022 жылы шілдедегі үкіметтің кеңейтілген отырысында жол бойындағы сервисті қалыптастыру жұмысын сынға алып, «ҚазАвтоЖол» мен «Қазақавтожол» компанияларын біріктіруді тапсырды. Осыған орай ҚР Үкіметінің 2022 жылғы 8 қыркүйектегі № 670 қаулысымен "Қазақавтожол" жауапкершілігі шектеулі серіктестігінің жарғылық капиталындағы 100% мемлекеттік қатысу үлесі "ҚазАвтоЖол" ұлттық компаниясы" акционерлік қоғамының акцияларын төлеуге беріліп, біртұтас автожол компаниясы құрылды.

Басқарма төрағалары

Ерік Хамзаұлы Сұлтанов (2013-2014)
Берік Сайлауұлы Камалиев (2014-2015)
Ермек Әнуарбекұлы Қизатов (2015-2019)
Ұлан Тоқтарбайұлы Әліпов (2019-2021)
Асқар Мұратұлы (2021-2022)
Мейірхат Мейрамханұлы Қасымбаев (2022-2023)
Дархан Серікұлы Иманашев (2023-)

Дереккөздер

"ҚазАвтоЖол" ұлттық компаниясы" акционерлік қоғамының 2023 – 2032 жылдарға арналған даму жоспарын бекіту туралы
"Қазақ автомобиль жолы" республикалық мемлекеттік қазыналық кәсіпорнын құру туралы
Қазақстан Республикасы Көлiк және коммуникация министрлiгi Автомобиль жолдары комитетiнiң "Қазақавтожол" шаруашылық жүргiзу құқығындағы республикалық мемлекеттiк кәсiпорнының "Қазақавтожол-Көкшетау" еншiлес мемлекеттiк кәсiпорнын қайта ұйымдастыру туралы
Автомобиль жолдарын басқару жөніндегі ұлттық оператор туралы
"ҚазАвтоЖол" акционерлік қоғамын қайта атау туралы
Қазақстан Республикасының Инвестициялар және даму министрлігі Автомобиль жолдары комитетінің "Қазақавтожол" шаруашылық жүргізу құқығындағы республикалық мемлекеттік кәсіпорнын қайта ұйымдастыру туралы
Республикалық меншіктің кейбір мәселелері туралы

[1] "ҚазАвтоЖол" ұлттық компаниясы" акционерлік қоғамының 2023 – 2032 жылдарға арналған даму жоспарын бекіту туралы

[2] "Қазақ автомобиль жолы" республикалық мемлекеттік қазыналық кәсіпорнын құру туралы

[3] Қазақстан Республикасы Көлiк және коммуникация министрлiгi Автомобиль жолдары комитетiнiң "Қазақавтожол" шаруашылық жүргiзу құқығындағы республикалық мемлекеттiк кәсiпорнының "Қазақавтожол-Көкшетау" еншiлес мемлекеттiк кәсiпорнын қайта ұйымдастыру туралы

[4] Автомобиль жолдарын басқару жөніндегі ұлттық оператор туралы

[5] "ҚазАвтоЖол" акционерлік қоғамын қайта атау туралы

[6] Қазақстан Республикасының Инвестициялар және даму министрлігі Автомобиль жолдары комитетінің "Қазақавтожол" шаруашылық жүргізу құқығындағы республикалық мемлекеттік кәсіпорнын қайта ұйымдастыру туралы

[7] Республикалық меншіктің кейбір мәселелері туралы