Қазақстан азаматтық партиясы

Қазақстан азаматтық партиясы – қоғамдық-саяси ұйым. Құрылтай съезі 1998 жылы 17 қарашада Ақтөбе қаласында өтті. Съезде партия жарғысы мен бағдарламасы қабылданып, бірінші хатшысы болып А.Перуашев сайланды. 1998 жылы 29 желтоқсанда Қазақстан Республикасы Әділет министрлігінде тіркелді. Партия демократиялық құқықтық мемлекет құру, азаматтық қоғам институттарын қалыптастыру, Қазақстан Республикасының мемлекеттілігінің нығаюы мен дамуына ықпал ету мақсатында қызмет етеді. Қазақстан азаматтық партиясы мүшелерінің басым бөлігі – металлургия өнеркәсібі мен тау-кен өндірісі кәсіпорындарының қызметкерлері мен жұмысшылары, инженерлік-техникалық мамандар. Партияның басшы органы – ОК. Қазақстанның барлық облыстарында және Астана мен Алматы қалаларында өкілдіктері жұмыс істейді. 1999 жылы Парламент сайлауында сайлауға қатысқан сайлаушылардың 12% дауысын жинап, партия 7%-дық межеге жетті. Екінші сайланған Парламентке Қазақстан азаматық партиясынан барлығы 18 депутат сайланды (Сенатқа – 2, Мәжіліске: партиялық тізім бойынша – 2, бір мандатты округ бойынша – 14). Партия Ресейдің “Наш дом – Россия” партиясы, “Ресейлік Өмір партиясы”, Украинаның “Батьковщина”, Қытайдың коммунистік партияларымен байланыстар орнатқан. Қазақстан Республикасының 2002 жылы 15 шілдеде қабылданған “Саяси партиялар туралы” Заңына сәйкес 2003 жылы 10 қаңтарда Әділет министрлігінде қайта тіркеуден өтті. Партияның 100 мыңнан астам мүшесі бар.

Дереккөздер

1. «Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 ISBN 5-89800-123-9, V том