Almaty TV Алматы қаласынан хабар тарататын Қазақстандағы жалпыұлттық телеарна 1999 жылы негізі қаланған Almaty TV Almaty

Almaty TV — Алматы қаласынан хабар тарататын Қазақстандағы жалпыұлттық телеарна. 1999 жылы негізі қаланған.

Almaty TV
«Almaty» Телерадиокомпаниясы» АҚ

Ел	Қазақстан
Хабар тарату аумағы	Қазақстан
Хабар тарату уақыты	тәулік бойы
Хабар тарату тілдері	қазақша, орысша
Басқару орталығы	Алматы қаласы, Ғабдуллин көшесі, 88А
Бейне форматы	16:9
Арнаның тақырыптамалары	ақпараттық, ойын-сауық
Хабар таратуын бастады	11 наурыз 1999 жыл (компания құрылды) 6 шілде 2000 жыл (телеарна іске қосылды)
Иесі	Алматы қаласының әкімдігі
Бас директоры	Тимур Базарбаев
Бұрынғы атаулары	Южная Столица Алматы, қысқаша ЮСА (2000-2005) Алматы (2005-2017)
Сайт	almaty.tv

Тарихы

1999 жылы «Оңтүстік Астана» телерадиокомпаниясы» АҚ «Алматы қалалық телерадиокомпаниясы» МКМ Алматы қаласы әкімінің 1999 жылғы 11 наурыздағы N 224 шешімімен құрылды, №25904-1910-ГП мемлекеттік тіркеу туралы куәлігін Алматы қаласы юстиция басқармасы 1999 жылы 14 сәуірде берген. Бұқаралық ақпарат құралдарының тізіміне алғаш рет №654-ТРК 1999 жылғы 30 сәуірде енген.

Телеарнаның алғашқы директоры болып 2005 жылға дейін Исаак Яковлевич Дворкин жұмыс істеді.

2000 жылдың 6 шілдесінде телеарна алғаш рет эфирге шығып, хабар таратты.

Алматы қаласы әкімінің 2000 жылғы 6 қарашадағы шешіміне сәйкес, Алматы қаласы Мемлекеттік мүлік және жекешелендіру жөніндегі аумақтық комитеттің 2001 жылғы 8 тамыздағы шешімімен «Алматы ОА-Алматы ЮС» Алматы қалалық телерадиокомпаниясы» МКМ-сі «Оңтүстік Астана» телерадиокомпаниясы» ЖАҚ болып қайта құрылды.

ҚР Акционерлік қоғамдар туралы заңына сәйкес 2003 жылдың 13 мамырда № 415-ІІ Заңын орындау мақсатында Алматы қаласының коммуналдық меншік басқармасының 2004 жылғы 20 қаңтардағы шешімімен «Оңтүстік Астана» телерадиокомпаниясы» АҚ болып қайта тіркелді.

2005 жылы телеарна директоры болып Мустафин Санжар Анатольевич тағайындалды.

2006 жылғы 1 желтоқсандағы №KZ50VJB00000122 бұқаралық ақпарат құралдарын есепке алу туралы куәлігін ҚР Көлік және коммуникация министрлігінің ақпарат және мұрағат комитеті берді.

2008-2009 жылдары телеарнаны Жанахмет Жәнібекұлы Ағыбаев басқарды.

2009 жылы телеарна басшысы болып Грюнберг Евгений Валерьевич тағайындалды.

2013-2015 жылдары телеарнаны Алматы қаласының әкімі кеңесшісі болған Куянов Сергей Леонидович басқарды.

2016 жылдың 13 қыркүйегіндегі №KZ66VJB00000125 отандық телерадиоарналарды қайта есепке алу туралы куәлігін Қазақстан Республикасы Ақпарат және коммуникациялар министрлігі байланыс, ақпараттандыру және бұқаралық ақпарат құралдары саласындағы мемлекеттік бақылау комитеті берді.

2015 жылдың қараша айында телеарна басшысы болып Әлденей Әлібек Үсенұлы тағайындалды.

2017 жылы телеарнада ребрендинг жүргізілді. Дизайнды әзірлеу кезінде графикалық суретшілер әлемдік трендке сүйенді. Ең бастысы - қарапайымдылық пен тартымдылық. Телеарна логотипінде алманың орнына оңай танылатын белгі мен «Алматы» деген жазу пайда болды.

Материалдық-техникалық база жетілдірілді. Заманауи жаңа құрылғылармен жабдықталған (өндірістік жол анықтығы жоғары цифірлік формат HD сапасы) жаңа студия павильоны қолданысқа берілді.

Конент толығымен жаңарды (барлық тақырыптық бағыттар мен жанрларды қамтитын сапасы жоғары 25 меншіктік бағдарлама жасалды). Телеарна эфирлік көрсеткіштерін арттырып, өзіндік форматын әзірледі.

2018 жылы Ақордада телеарна «Қазақстандық журналистика мен ұлттық телевидениенің дамуына қосқан үлесі үшін» грамотасымен марапатталды. Сол жылы телеарна You Tube арнасының «Күміс түймені» иеленді.

2019 жылдың 6 наурызы мен 5 шілдесі аралығында арнаны Қалянбеков Болат Серікұлы басқарды.

Сәуір айында телеарна «Әкіммен ашық әңгіме» жобасын іске қосты. Сол жылы «Інжу маржан» бағдарламасының жүргізушісі Ұлжан Байбосынова Өзбекстанда өткен өнер фестивалінде үздік атанды.

2019 жылдың 22 шілдесінен бастап 2022 жылдың 28 наурызына дейін телеарнаны Мухамеджанова Нұржан Жалауқызы басқарды.

2019 жылы жұмыс нәтижесі жақсы болып, «Ең үздік аймақтық арна» номинациясы бойынша «Тұмар» ұлттық телевизиялық сыйлығының жеңімпазы атанды.

Жыл басында эфирде «Алматы» телеарнасының «Таңғы студио» атты таңертеңгілік ақпараттық-ойын-сауық бағдарламасы пайда болды.

COVID-19 пандемиясы кезінде – барлық мектептер қашықтан оқытуға көшіп жатқанда «Алматы» телеарнасы 9-11-сынып оқушыларына арналған сабақ көрсетілімін жүргізді.

2022 жылдың басында «Алматы» телеарнасында алғаш рет роботталған камералар жүйесі жұмыс жасай бастады.

Almaty телеарнасының студиялық павильоны жаңа телевизиялық техникамен толықты. Жаңалық тарататын студияда тікелей эфир тарату үшін және басқа да ақпараттық-сараптамалық бағдарламаларды шығару үшін автоматталған Tecnopoint TUNING құрылғысы бар «AW-UE 150W» камералары орнатылды.

2022 жылы 28 наурызда «Алматы» телеарнасының басшысы болып Тимур Талғатұлы Базарбаев тағайындалды.

Ол басшылыққа келген алғашқы бірнеше ай ішінде «Алматы» телеарнасының қызметін және оның хабар тарату саясатын жетілдіру, оның ішінде шығындарды азайту бойынша кешенді жұмыс жүргізілді. Өндірістік жүктемені дұрыс бөлу, қызметкерлерді материалдық тұрғыда ынталандыру мәселелері жолға қойылды. Жаңа телемаусымда коммерциялық кіріс көлемі күрт өсті.

21 шілдеде Almaty.tv сайты Ақпарат және қоғамдық даму министрлігінің Ақпараттық агенттік және желілік басылым ретінде есепке алу туралы куәлігін алды.

4 тамыздан бастап «Алматы» телеарнасы Қазақстан Республикасының барлық аумағында міндетті түрде көрсетілетін арналар тізіміне енгізілді.

Аудиторияны техникалық қамту 47 пайыздан 89 пайызға дейін артты, бұл көрермендер санының өсуіне оң әсерін тигізді. TNS Central Asia зерттеу компаниясының мәліметі бойынша, арна аудиториясының бір тәуліктегі орташа үлесі сәуір айымен салыстырғанда 70 пайызға артқан.

«Алматы» телеарнасы 2022 жылдың жаңа телемаусымында көрерменге 8 әлеуметтік-драмалық және тарихи сериал, ішкі өнім ретінде 26 бағдарлама, оның ішінде 11 жаңа тележоба ұсынды. Бұл жобалардың жартысы жарнамалық бюджет есебінен дайындалды.

Форматы мен жанры аудитория сұранысына сәйкес келмеген, рейтингі төмен 13 бағдарлама жабылды. 4 тележобаның форматы қайта жаңғыртылды. Телеарнаның бағдарламалық саясатындағы тағы бір жаңалық - арнадағы жобалардың 75 пайызы қазақ тілінде дайындалады.

2022 жылы телеарнада ребрендинг жасалды.

Брендтің жаңаруы «Алматы» телеарнасы дамуының жаңа кезеңге аяқ басқанын және контент сапасы артып, дәстүрлі эфир мен цифрлық интернет синергиясына бет алғанын көрсетеді. «Алматы» телеарнасы ересектер аудиториясын да, әлеуметтік желілер мен онлайн ресурстарды кеңінен қолданатын жас көрермендерді де кеңінен қамтитын «заманауи классикаға» барынша көңіл бөлмек.

Маркетингтік мақсатта рестайлингті, жаңа айдентиканы және эфирлік безендіруді, жаңартылған хабар тарату кестесін және т.б. қамтитын шаралар қабылданды. Алғаш рет тележобаларды эфирде және эфирден тыс дамыту мақсатында телеарнаның біртұтас имидждік стратегиясы қабылданды.

2023 жылы телеарнаның түсірілім павильоны жаңартылды. Реконструкциялау аясында кез келген күрделі тележобаларды түсіруге мүмкіндік беретін қазіргі заманғы бейімделгіш декорациялар салынды, төзімді полимерлі толтырғыш жабын қолданылды. Студияның пайдалы алаңы 2 есе ұлғайтылды. Сонымен қатар Алматы әкімдігінің қолдауымен жаңа түсіру және монтаждау жабдықтары сатып алынды.

Қала әкімі Ерболат Досаевтың қатысуымен өткен тұсаукесер барысында телеарнаның бас директоры Тимур Базарбаев соңғы 1,5 жылда телеаудиторлардың өсуі шамамен 70%-ға жеткен, ал сайтты қарау 5 есеге – жылына 9-45 миллионға дейін артқанын айтты. Коммерциялық кірістер 65%-ға, медиа сатушы желісі бойынша 2 есе өсті.

2023 жылы Almaty TV 18 тележобаны ұсынды. Өз өндірісінің мемлекеттік тілдегі үлесі 83%-ға дейін жетті.