Қосалқы бөлшектер

«Қосалқы бөлшектер» АҚ – өндірістік кәсіпорын. Жамбыл қаласының шығыс жағында 25 га алаңды алып жатыр. Өндірістік корпустарының ауданы 4,8 га. Кәсіпорын 1940 ж. құрылған. 1995 жылға дейін «Запчасть» зaуыты аталып келді. Кәсіпорын тракторларға, комбайндарға, т.б. ауыл шаруашылық машиналарға қосалқы бөлшектер жасауға маманданған, сондай-ақ, халық тұтыну тауарларын шығарады. Акционерлік қоғам құрамына болат құю, механикалық-штамптау, тасымалдау, пісіру-құрастыру және құрал-саймандық цехтар кіреді. Бұлармен қатар, ағаш өңдеу және тігін цехтары бар. Негізгі өндірісі – болат құю цехының жылдық өндірістік қуаты 12 мың т. Бұл цех үлгілі 4 электр пештерімен, құю конвейерімен және 2 термопешпен жабдықталған. Механикалық-штамптау цехында сығу күші 1000 т престер, әр түрлі қосалқы бөлшектер дайындайтын фрезерлік, токарлік, т.б. станоктар орнатылған. Акционионерлік қоғамның президенті – Ж.Молдашев.