Павлодар мұнай өңдеу зауыты

Павлодар мұнай өңдеу (айыру) зауыты - күкірті аз Батыс Сібір мұнай қоспасын өңдеуге маманданған кәсіпорын. Өнімділігі жөніне Қазақстанның ең қуатты мұнай айыру кәсіпорны, акционерлік қоғам. Пайдалануға 1978 жылы берілді. Технологиялық және аумақтық жағынан әзірге транссібірлік мұнай құбырларының жүйесімен байланысты. Зауыттың жобалы қуаты - 12,7 млн. т, жылына 7,5 млн. т. мұнай өңдейді. Гидротазалаудың қарапайым сұлбасымен іске қосылған, өңдеуші қосымша жаңа қондырғылар (каталитиздік крекинг, баяулатылған кокстеу, мазутты вакумдық айдау, мұнай таушайырларын алу, газды фракциялаушы қондырғы т.б.) 1983-1986 жылдарда іске қосылды. Зауыт А-80, А-91, АИ-95 маркалы автобензин, авиакеросин, дизель жанармайын, қазандық отынын (мазут), сұйылтылған газ, мұнай таушайырын, кокс т.б. шығарады. Мұнай өңдеудің тереңдігі - 80%. КСРО тарағаннан кейін зауыттың жұмысы түгелімен қазақстандық мұнайға айырбас ретінде Самарадан алынатын ресейлік мұнайға тәуелді болып қалды. Осыған байланысты, зауыттың басқару құрылымына өзгерістер енгізілді. 1997 жылы зауытты концессияға беру туралы келісімнің жеңімпазы "CCL Oil Ltd" американдық компания болып шықты да, ол зауытты үш жылға концессияға алды. Қазіргі кезде зауыт активтерінің иегері "Маңғыстаумұнайгаз" акционерлік қоғамы. Зауыттың перспективасы Қазақстанның мұнай ендіретін аймақтарын Павлодар және Шымкент мұнай өңдеу зауыттарымен жалғау мүмкіндігін жүзеге асыратын Батыс Қазақстан - Құмкөл мұнай құбырының тартылуымен байланыстырылады.

Дереккөздер

1. Қазақстанның мұнай энциклопедиясы. 2 томдық - Алматы: "Мұнайшы" Қоғамдық қоры, 2005. ISBN 9965-9765-1-1