Ақ бантик әні

"Ақ бантик" — қазақтың танымал композиторы Шәмші Қалдаяқовтың әні, сөзін жазған ақын Мұхтар Шаханов. Бұл туынды қазақ музыка өнерінде ерекше орын алады және нәзік сезім мен жастық шақтың символы ретінде танымал. Әнде мектептегі алғашқы махаббат, аңғалдық пен адалдық жырланады.

«Ақ бантик» әні халық арасында кеңінен танылып, көптеген әншілердің репертуарларынан орын алды. Қазақ саз өнерінің майталмандары бұл әнді сүйіспеншілікпен орындап, жаңа буын орындаушылар да оның мән-маңызын сақтап жеткізіп келеді. Әннің өзіне тән әуезділігі мен сөздерінің тереңдігі қазақ жастарының жүрегіне жол тауып, ұрпақтан-ұрпаққа жалғасуда.

Әннің шығу тарихы

Бұл әннің өзге әндер сияқты шығу тарихы бар. Алайда, ән жарыққа шыққан бойда өзін кейіпкер етіп, әннің дүниеге келуіне себепкер ретінде көрсеткен бәзбіреулер оның шығу тарихын бұрмалаған. «Шәмші біздің үйге жиі келетін. Мен ол кезде ақ бантик киген кішкентай қыз едім», «Ақ бантик тағып жүрген мына маған Шәмші ән жолдаған» т.с.с. жалған сөздер желмен бірге елге кеңінен таралып, ән тарихы ескерусіз қалған.

Шәмші Қалдаяқов біраз жылдар Алматыда тұрып, «Ана туралы жыр», «Қайықта», «Ақмаңдайлым», «Ақсұңқарым» т.с.с әндерді дүниеге әкеледі. Кейін туған өлкесі Шымкент қаласына қоныс аударып, ол жақта «Арыс жағасында», «Мойынқұмда», «Сыр сұлуы», «Ақ бантик» әндерін жазады. Бірде сазгердің Қаражан Әбіләзимов есімді досы шаңырақ көтеріп, тойына бір топ жолдастарын шақырады. Араларында сазгер Шәмші мен ақын Мұхтар да бар.

«Тойға берер сыйымыз кәне? Одан да ән арнайық» деп ән жазуға кіріседі. Қаражан достарының жұбайы жаңадан мектеп бітірген балауса қыз екен. Осыны арқау етіп, ақын мен сазгер «Ақ бантик» әнін дүниеге әкеліп, жолдастарының үйлену тойында тарту етіп, шырқап береді. Әу баста, әннің сөздері өзгеше болып, кейін өзгертілген екен.

Ән мәтіні

Ақ бантик
Бірінші шумақ
Балауса қыз едің бір кезде Шашыңа ақ бантик байлаған. Өзгеріп кетіпсің бұл күнде Көркіңе көз тастап ойланам.
Қайырма:
Нұрлы бейнең қандай жарқын! Арманысың қандай жанның? Шынарым-ай, Сен – мөлдірсің, еркем, Тау бұлағындай.
2 шумақ
Жол жатыр шақырып алдыңда, Өмір тұр ұсынып шаттығын. Білмеймін бойжетіп қалдың ба? Шашыңда ақ бантик жоқ бүгін.
Қайырма
3 шумақ
Жылдардың еркіне бағындың, Жылдарға қол создың, жан құрбым. Белгісін балалық шағыңның, Айтшы, сен қай жерде қалдырдың?
Қайырма

Дереккөздер

1. "Ақ бантик" - тойға тарту әні.
2. Шәмші Қалдаяқов әні - Ақ бантик http://q99.it/UuTWwcp.