Медициналық жабдықтар

Медициналық жабдықтар - ауруларды емдеу-диагностикалық іс-шаралар барысында, сонымен қатар оларды күтіп-баптауда емделушілер мен медицина қызметшілерін оңтайлы жағдаймен қамтамасыз етуге арналған медициналық техникалық бұйымдар.

Таңу жүргізетін төсек: 1-матрац, 2-екі жақты тақта, 3-тақымдық, 4-көтергіш құрал, 5-көтергіш тепкі, 6-тақымдықты бекітетін тұсы.

Медициналық жабдықтардың топтары

Емдеу және тексеру іс-шаралары кезінде қолданылатын жабдықтар

Ауруларды тасымалдайтын жабдықтар

• әр түрлі тұрпатты арбашалар
  • алмалы-салмалы тақталы (зембіл ретінде пайдалануға болатын);
  • көтергіш тақталы;
  • әр түрлі функционалды (ауыр науқастар және реанимациялық);
  • балаларға арналған арбаша (жаңа туған нәрестеге арналған, ауру балаларды тасымалдайтын).

Медициналық төсек

• функционалды (әр түрлі қалыпқа келтірілетін);
• емханалық;
• травматологиялық ауруларға;
• сүйек туберкулезі ауруларына;
• психикалық аурумен ауыратындарға;
• акушерлік;
• күйікпен түскен ауруларға;
• жұқпалы ішек-қарын ауруларына;
• жаңа туған балаларға;
• 5 жасқа дейінгі балаларға;
• 5-14 жасқа дейінгі жеткіншектерге;

Үстелдер мен креслолар

• жан-жақты операциялық үстелдер - рентген өткізгіш тақтадан, тумбадан және дубляждалған басқару жүйеден (гидравликалық, электромеханикалық және электрогидравликалық) тұрады; қол ұстағыш, аяқ қойғыш, иық және қабырға тірегіштер, аяққа арналған таяныш, жұмыр жастық, бас сүйегіш, тартқыштар, таған сияқты алмалы-салмалы түрлі тетіктерді қолдану операциялық үстелдерді әр түрлі қалыпқа келтіреді;
• жаңа туған нәрестеге арналған санитарлық үстел (тұрақты температура ұстайтын қондырғы, тумбасында керекті жабынды жиынтық қойылған, алдыңғы жағына нәрестенің бойын өлшейтін сызғыш орнатылған);
• таңу (перевязочный) үстелі - фельдшер-акушерлік пункттерде шағын операция жасауға және таңу шараларын жүргізуге арналған, оны гинекологиялық кресло ретінде де пайдалануға болады;
• жиналмалы таңу үстелі (дөңгелегі алмалы-салмалы);
• палаталарда ауруларға медициналық көмек көрсету үшін, операциялық бөлімдерде, перзентханаларда дәрілерді, таңу материалдарын, дезинфекциялау ерітінділерін, құралдар мен аспаптарды қоятын және тасымалдайтын үстелдер қолдану мақсатына байланысты әр түрлі аталады: анестезиологиялық, құрал-жабдықты, акушерлік, манипуляциялық, төсек жанына арналған, операцияға және қолға оңтайлы, стоматологиялық, хирургиялық және т.б.

Емдеу және тексеру іс-шараларын жүргізетін жабдықтар

• Стоматологиялық жабдықтар;
• Рентгенологиялық жабдықтар;
• Радиологиялық жабдықтар;
• Дезинфекциялық жабдықтар;
• Анализге биологиялық материалдар дайындайтын жабдықтар.

Шаруашылық жабдықтары

• медицина құралдарын жуып-шаятын жабдықтар;
• стерильдейтін жабдықтар;
• термостаттар;
• су мен ауаны тазартқыш жабдықтар;
• ауруларды тамақпен қамтамасыз ететін жабдықтар;

Медициналық жабдықтар күтімі

Жабдықтардың тазалығы күнделікті сақталуы тиіс:

• Дезинфекциялау - сутек тотығының 3%-к ерітіндісі және 0,5%-к жуғыш затының қосындыларын пайдаланады.
• Сүрту - тотықпау үшін өңделген жабдықтарды құрғақ әрі жұмсақ материалмен сүрту қажет.
• Майлау - үйкелетін тұстарын майлау (вазелин және басқа майлармен).

Дереккөздер

1. Краткая медицинская энциклопедия, 2-том. Москва - 1989. ISBN 5-85270-056-8